試新車

會所Playroom黎左兩部新車，雖然告示話要一歲或以上的小朋友先玩得，但人一世物一世，我梗係要試試車先心息啦！

首先係紅色車：

Need a lift?

跟住係藍色車：

倒車，望清楚倒後鏡先！安全第一。

開銀行戶口

今日爹地媽咪帶我到大新銀行開戶口，係芝麻街兒童儲蓄戶口呀！


爹地媽咪仲入左舊六位數字的存款入去，年年咁入的話，十歲時我就會成為個百萬富翁了！

但媽媽話一定要佢簽名先至可以用Ｄ錢，即係有得睇無得駛，都係飲呢盒檸檬茶實際Ｄ！存摺，擺埋一邊啦！

愛心蛋牛粥

媽媽其實好懶，咁耐都未煮過粥仔俾我食，之前全部都係由婆婆煮的，響自己屋企我通常只有食grandma寄來的米糊。

今日係假期，媽媽終於肯親自下廚，用明火煮粥我食，睇下碗製成品先！

係咪睇得下呢？係碗熟蛋黃免治牛肉粥黎架！真係幾好食，睇下我食得幾滋味！




媽媽，Good Job! Keep It Up! （如果唔讚佢佢以後都唔會煮粥粥我食) >.<

中秋節

尋日係我第一年響媽咪肚仔以外的中秋節，太婆俾左利是我買燈籠，但最後媽咪都決定唔買，因為家陣膠製的燈籠質素無保障，而我又處於Oral Stage（媽媽話晒讀左三年心理學，拋下書包先），怕我一拿起手就咬燈籠會中毒（真誇張！），所以或者下年先買。佢將太婆俾我的利是做了更好更多人可以分享的事，就係用黎買左蛋糕響婆婆屋企成家人過節食，真好！^V^

尋晚無落雨，公公帶左我去樓下的公園賞月同埋同其他小朋友玩，我的第一個中秋節過得很開心呢！

睇開呢個blog的讀者，還記得上年的中秋節我同你打過招呼嗎？Full Moon (10.2006)

Mosaic Five - 我係半個中國人

Mosaic Four - Anpanman & Thomas

Mosaic Three - 甚平look

禮服肥豬巧

星期五係細契媽大婚之喜，媽媽特別從BK媽咪度幫我訂左呢套禮服去坎，係咪好cute好靚仔呢？kakakaa....



契媽，媽媽本來想將我呢個look保留到星期五先公開，但如果係響結婚之前你居然有時間上我個blog的話，咁就只有一句，先睹為快啦！^^

Mosaic Two - 豬肉巧

Mosaic One - 足球小將

餵奶cushion

媽媽拜讀小C媽媽阿四的部落文章（別了，my breast friend)，即刻拿起相機替我的開飯龍椅拍下相片。

呢個cushion載著好多好多我同媽媽的回憶，好有紀念價值的...

話說媽媽響我未出世時巳經買了一個餵奶枕，但點知原來太厚太硬，剛剛出世的我訓得唔舒服，所以爸爸即刻在網上由日本訂了這個cushion，送到爺爺屋企，再由爺爺嬤嬤響我三星期大時hand carry帶來香港，真係山長水遠。

之後我同呢個枕枕朝夕共對，但好景不常，我體型日漸龐大，如果我訓響枕枕上面，媽媽一邊餵奶時又要一邊泵奶時就好難就位，所以開始有點疏遠。但因為我真係重得好緊要，媽媽如果要舉住我二三十分鐘食奶的話，雙手應該好快會殘廢，所以當不用泵奶時，我同枕枕又走在一起。

枕枕上面應該無屎屎，但就充滿左汗水，口水，同奶水，最重要的是，充滿左媽媽對我的愛。

我是全人奶BB，巳經八個多月了，而且在繼續中。多謝枕枕陪伴我左右，陪伴我成長。

趁墟

媽媽通常都係帶我到又一城shopping，但Larry媽媽前幾日帶左Larry去尖沙咀Ocean Terminal玩，媽媽見到之後今日又帶我去尖咀玩具反斗城玩。



我好好好鐘意呢架walker+車車呀，玩到唔捨得走，但今日得媽媽一個人sling我出街，佢無本事買佢俾我呀，所以佢聽日去舉完人肉國旗之後就買返黎俾我，真好！^^

一絲不掛

其實我有著片片的！^V^

換季

媽媽話今年的秋天早了到來，朝早帶我打的到婆婆家時都感到陣陣涼意，所以就趁早替我入貨換季。媽媽到過吉吉島，SOGO，西田，MEGA BOX等地方幫我睇衫，但總覺得唔係好靚，所以都係響jshoppers訂就算了，佢係有舖網上購物癮的。睇下我Ｄ新衫衫褲褲，其實仲有五六件響婆婆度，計埋大大話話呢度有成二十件，買左成千蚊了。下個月おじちゃん同おばあちゃん飛黎香港探我，到時又有新衫了！



但媽媽，你好似仲未買鞋鞋俾我喎！

Busy Wheeler

呢個係我的新玩具，媽媽話佢叫做Busy Wheeler，功用同呢個俾哈姆太郎玩的野差不多...

長話短說，即係吸響張high chair度令我對手好唔得閒而減少大叫的玩具，我一見到佢就會係咁轉佢，好好玩架！

o架仔大戰益生菌

媽媽之前響美食博覽買俾我的益力多益生菌仔仔，我好好好錫佢架！



媽媽，o架妹大戰機械獸呢套咸片名out得好厲害啦，你咁o既起題會令我俾人笑老土架！

影樓沙龍

9月15日係我的八個月生日同埋媽咪的31歲生日(媽媽按:仔，仲乜爆響口講我的年齡出黎 >.<)

爹地媽咪同我到mybabyface影樓影相，果度好多哥哥姐姐同我玩呀。佢地見我咁健碩，仲同我玩得好開心添。到揀相時爹地媽咪根本無理我，由得我由哥哥姐姐抱住，hehee...

不過我果日影到好倦呀...行去影樓的途中訓左，俾媽咪整醒影相，之後都狀態ok，不過到尾段真係頂唔住啦，開始發老脾，媽咪見我in bad mood都唔再迫我，草草了事收尾就算了...

睇相啦...

http://www.mybabyface.hk/200709/takumi/mygallery.htm

BTW, 呢輯相係用我響半歲生日會時，參加精叻古怪表情之最，得到冠軍時所得的攝照禮券影的，所以影左總共千多元，最後亦只需七百多元埋單！

BB也Shopping

爹地媽咪上星期六同我到apm的JUSCO，我第一次坐JUSCO車仔呀，上一次姨姨帶我到惠康坐過一次車仔，不過JUSCO呢架低Ｄ。

我坐左一陣就唔高興啦，點解？因為平時媽媽同我去街街會用條baby sling揹我一面行一面傾偈的，但坐車仔我覺得好寂寞呀，淨係望到其他人的下半身，好悶呀！(>.<)

TAMATAKUMI

媽媽話我定時定候叫肚餓,得閒無聊就搵人玩,又會周不時大小二便,照顧我就好似湊隻tamagotchi咁...





(Acknowlegement: Thanks, Tabris哥哥!)

我係馬渡巧，靈巧的巧！

我Takumi雖然係一個超級重磅的XL碼baby，但係我一Ｄ都唔論盡，識得做好多野，包括：

- 坐得好穩
- 爬得好快（係手腳交义爬果隻，爬爬的最高境界）
- 互動拋波（我明白give & take的道理，人地拋個波俾我，我接住之後要拋返俾人，咁樣就係互動啦！）
- 扶欄站立（暫時只識扶床欄，其他野如几仔梳化未係好manage到）
- 借媽媽對手的力自己站起來（呢招無乜特別，好多ＢＢ都識）
- 做sit-up（呢招係今日先識的，我訓響梳化度，爹地按住我的腳，我腰力夠到可以做sit-up坐起身，公公都話我勁）
- 宜家學緊合埋打開手講byebye，不過未係好得

我肥，但係我好靈活架，爹地媽咪幫我改名改得好，我係馬渡巧，靈巧的巧！V(^_^)V

騎膊馬

坐在爸爸的膊頭上,我的目光看到更高更遠...

企到啦!!

我自己可以扶起床欄企起身啦，我開心到欲罷不能，係咁企幾個字都唔知腳軟呀!!!

朝早的笑臉

「期望每朝早，起身一吻紅的臉...」

我朝早訓得夠的話心情好好的，睇下我幾開心!!!

0701BF媽咪集會

這是我的好朋友Larry，我唔係蝦佢，只不過我天生熱情，摸下佢啫…

食粥仔

婆婆尋日開始煲粥仔我食，第一餐係瘦肉味白粥，第二餐係瘦肉味南瓜白粥。

媽媽以為我食粥之後可以慳返Ｄ奶，點知我食完粥粥之後係都要飲返幾安奶先安樂。媽媽的如意算盤打唔響，計埋一日我總共飲了20+安奶同兩次粥仔......

媽媽呢幾日仲要pick up返個泵奶schedule，因為上星期好忙時個schedule亂晒，而且要飲黑豆水，南棗桂圓水，同埋黑豆漿谷衡佢，辛苦晒！ ('3')

忙碌的媽媽

媽媽呢個星期好多野做呀，因為佢負責學院響會展個Fair入面擺果個攤位，話大唔係大，話細唔係細，都有成36 sq meter，仲要請埋醫管局位主席黎剪綵，又要出報紙同埋請記者，又要印好多印刷品，做到佢一頭煙！

媽媽居然忙到15/8睇set up睇到十二點，無湊我返屋企，無同我慶祝七個月生日呀，too bad!

爹地媽咪為左俾我見識下大場面，尋日就帶我去左一轉個Medical Fair，我都算好乖，只係肚餓時扭了一陣計。媽媽負責果個booth好靚架，梗係啦，我媽媽黎架喎，上一份工無地方發揮佢的創意，所以佢覺得呢份工好好玩。

同埋呢，原來響大學入面做讀書可以免費架，但就要undertake囉，媽媽為左我諗住讀多個有關日文的Master Degree，其實佢巳經有一個碩士學位架啦，不過想第日可以同我的老師溝通得好Ｄ，佢先想再讀多一個，但係首先佢要考到個日文能力試二級先可以讀。媽媽，俾心機呀！

いない いない ばあーつ

這是我的書書，書名叫做「いない　いない　ばあーつ」，講Ｄ乜，你睇下先啦：


就係咁無聊，不過我又勁鐘意睇喎！




我前面包鈣思寶係媽媽飲黎做奶奶我飲的，但佢飲之前就要俾我「蒜」一輪先准飲，kakaka... ^^

@ The Playroom - 玩車仔

呢架車仔好大架呀，屋企無咁大架車車呀！

@ The Playroom - 騎馬仔

今日係馬術測試賽第一日，話晒媽媽之前都響馬會做，我就騎下馬仔應下景啦，人地係「盛裝舞步」，我就係「赤腳騎士」啦！

@ The Playroom - 爬呀爬呀

我地屋企個會所有個好大的Playroom，爹地媽咪weekend都會帶我落去的，但上星期我落去玩時剩係好似舊飯咁坐響度，今次唔同啦，因為我學識爬爬啦！kakakaa....^^

第一個颱風 - 帕布

帕布好得意架，佢星期頭開始黎香港，打到三號風球就sayonara，點知佢知道媽媽想見佢，今朝一個大U-TURN返黎，媽媽就多半日假陪我了！

帕布係我咁大個BB第一次遇到的颱風呀！^^

爬到了！

爸爸媽媽，我大個仔了，我識得自己爬爬了，我可以控制我的活動空間，唔駛等你抱抱我先可以動了！

媽媽，我的猛長期確實係猛左Ｄ，但個痴線病好了後我便可以爬了，係咪就算辛苦都係值得呢？

爬呀爬呀，好野！！

新奶泵

媽媽為左保護佢對to be翻發的媽媽手，破費買了個Ameda電奶泵，盛惠$1,520...我要俾心機飲多Ｄ奶奶先得啦！

呼風喚雨

婆婆之前講過，男仔bu口水就會下大雨，媽媽仲笑婆婆信埋Ｄpseudo science，一Ｄ都唔科學化。

尋晚同婆婆姨姨爸爸媽媽落會所游完水水返黎後，唔知點解戚起條筋起勢bu口水，bu到件衫都濕晒要換，婆婆話好快會落雨啦。

無錯，訓覺之後就落大雨，係大雨到Ｄ雨聲整醒媽媽。第日見到我bu口水的話就記住唔好室外晾衫，同埋記住帶遮啦，唔好話我唔醒你，我識呼風喚雨架！！

達標

來自eeb-EE的禮物，多謝媽媽呢六個半月以來的奶奶，多謝媽媽陪我渡過一個又一個猛長期的耐性，多謝媽媽令我成為香港BB入面以純母乳餵大到六個月的13.5%的其中一人，多謝媽媽！