1月15日ＢＢ？

呢排媽咪帶我去胡醫生度檢查時，照出黎的超音波相都好難睇得明，事關本少爺巳經長得十分大過，果個小小的scanner巳經影唔晒我，所以媽咪都無post果幾張相出黎。

但係因為我體型大的關係，本來諗住順產的媽咪開始有點動搖，加上醫院又成日滿，又無得訂順產期，所以上星期五媽咪請胡醫生先book了1月15日早上7:30開刀的期，以防萬一。媽咪宜家都十五十六應該點算，因為胡醫生話如果walk-in順產無位的話，佢會幫媽咪搵其他醫院，但如果都無位呢，就要入政府生，一向麻煩又有少許潔僻的媽咪當然打死都唔入政府醫院啦！所以佢呢幾日成日同我傾偈時問我鐘唔鐘意1月15日出世，我都有俾下反應佢，踢佢兩野，但最終都要佢自己決定想唔想開一刀啦。

唱Ｋ記

媽媽尋晚帶我去唱Ｋ，賀Uncle Chung的生辰，因為實在太嘈啦，我成晚響媽咪個肚入面係咁踢，迫佢12點要走，哈哈！其實媽媽帶過我唱過幾次Ｋ了，不過之前我未識得聽野，同埋太細個，媽媽咪唔知我唔鐘意咁嘈o羅！佢宜家知道了，睇下仲夠唔夠膽帶我去唱Ｋ！

Auntie Silvia仲送左好多衫衫同口水肩俾我，加埋媽媽買果Ｄ，夠我著到半歲了！好野！！！多謝Silvia姨姨！！

窺探我的樣子

大頭蝦的媽媽忘了照4D的最佳時刻是26-28W，佢等到我28W幾日先至問醫生refer去照，點知介紹的兩位醫生都約不到，攪到我無得照4D scan，好彩去檢查時胡醫生補捉到我蒲個頭出黎的一刻，爹地媽咪可以隱約地見到我的肥肥的面。

2006.11.2---中間果撻係我的鼻鼻同咀咀，隔離果點係我的眼眼！

2006.11.30---見到我的額頭，眼眼，鼻鼻同咀咀嗎？

Leon哥哥

媽咪今晚好開心，因為可以響電視睇到佢最鍾意的Leon哥哥，確實係靚仔到震，媽咪仲同我講如果我第日大過可以有佢咁高咁靚仔就好了！Hehehee...

前排媽咪問爹地，我第日個名可唔可以叫Takumi Leon Mawatari，爹地話佢short short地，唔鬼理佢，好搞笑！

Above Average

媽咪同爹地今日帶我到胡醫生度檢查，醫生幫我度size:

BPD（頭圍）：7.3 cm
FL （大腿骨）：5.5 cm
AC（肚圍）：24.5 cm
體重：3.5 lbs

胡醫生話我的size是above average，我是小肥巧！Hehehe...

媽咪同爹地應該下星期帶我去照3D/4D，因為爹地想睇下我個樣！各位觀眾，密切期待！XD

我長大了！

近兩個月我大得越黎越快，媽媽快被我踢到瘋了！宜家媽媽就算唔擺隻手在肚上面，單憑肉眼都可以見到我在入面一伸一展，爹地見到媽咪個肚震震下都話我仲乜開心得咁緊要！

仲有唔夠三個月我就出黎啦，好快就可以見到各位Uncle, Auntie, 契媽契爺啦！XD

全身相

媽媽星期四又帶我到胡醫生處檢查，我大個左好多呀，仲有對長長的腳，爹地話我似佢喎！XD

我響張相入面調轉左個頭，所以你地會見到我圓圓的頭在下面，中間左面果個係我個身，上面打橫伸出黎的就是我的腳腳，媽咪話好似對田雞腳呢！

Full Moon

媽媽個肚俾我撐到好似下星期八月十五個月亮一樣，又圓又大，仲凸起添！哈哈哈！

(註：兩張相都係出自爹地的手筆)

又食好味壽司

今日媽咪班大學莊員Uncle Auntie請媽咪食生日飯，到了尖沙咀的Sushi Hiro，爹地都有陪媽咪去。

媽咪當然點了我最鍾意的海膽壽司，仲有兩舊咁多呀！又有Chu Toro, Negi Toro, 帶子,....好多好多，入口即溶，回味無窮！

因為好開心，我仲響媽咪個肚入面跳左成晚舞呀！:D

媽媽的肚臍

我一日一日長大，媽媽的肚也一日一日膨脹。近日媽媽開始投訴我整到佢個肚臍突出來...

我都唔想嫁，鬼叫我越來越大個咩。學爹地話齌，肚臍突出後咪可以洗乾淨囉，橫掂三十年都未突過出黎清洗過！

我的咕咕

各位觀眾：

令媽咪徹底死心的一張相，請欣賞！
見到中間果點嗎？就係我的咕咕！

Takumi XD

小熊維尼

媽媽近來開始搜購衣服及日用品給我出世後用，買了：

(1) 藍色棉背心一件
(2) Hello Kitty奶樽袋一個 (Daddy話唔好，但Mommy照買！)
(3) Winnie the Pooh包被一張
(4) Marks n Spencer口水肩五件及帽仔襪仔一set
(5) 婆婆儲coupon換的惠康小熊維尼公仔

媽咪到百貨公司望住Hello Kitty的物品有得睇無得買，又唔鍾意新幹線，怕我第日大過之後做個電車男或者呆滯巴士迷，所以決定以Disney Babies為目標，特別是Winnie the Pooh，都好呀！

恭喜LoLo姨姨!!

媽媽今日同LoLo姨姨通電話，LoLo姨姨會於下年的今日結婚，恭喜賀喜!!到時睇下我可唔可以做LoLo姨姨的花仔啦!!

如果LoLo姨姨快D生個小朋友黎陪我玩就好了，最多我唔蝦佢啦!!

開P

媽媽今日晨雞咁早起身，因為佢約左好多舊鄰居同小朋友黎會所陪我開Ｐ，佢要起身將雞翼解凍同整腸仔，佢係識整呢兩味架炸！:P

大隻Ｂ哥哥

今日係Lillian姨姨的大隻Ｂ哥哥出世的大日子，Lillian姨姨話俾媽咪聽哥哥重成9.5lb，好勁呀！Lillian姨姨的ＢＢ同我一樣都係Mix黎架，佢爹地係澳洲人！媽咪就同我講叫我唔好大隻得咁緊要，因為佢想我自然順產出世，大隻得滯就唔得了！

喂，媽咪，你成日唔肯食野，我點會肥肥呀！有爹地的DNA都要有營養o架，你快Ｄ俾心機食多Ｄ野啦！！！

我的依貓

各位觀眾，經過媽媽同PCCW的一輪周旋之後，媽媽終於幫我開左個email address了，雖然我未出世，但媽媽話會將收到的email印出黎留返俾我大過仔睇喎! 你地有心情有時間的話就send個貓俾我啦，我大過之後一定會記得你地嫁!!! :D

takumi@netvigator.com

我的近照

媽咪終於數碼化了胡醫生幫我響10/8影的沙龍，我又大個左差不多成倍了，宜家的size:

CRL (頭殿長, i.e. from Head to Pat Pat): 11 cm
BPD (頭圍): 3.4 cm
FL (大腿骨長): 1.5 cm


胡醫生幫我照時我仲跳左part好勁的Break Dance佢地睇，醫生同爹地媽咪講「你地個ＢＢ都好係活躍下喎」，爹地媽咪聽完睇完勁擔心我出世後紥紥跳，好似黃偉豪哥哥（媽咪的唐細佬）一樣無時停......Hehehe....男仔活潑Ｄ唔係好Ｄ咩？

（媽咪按：我絕對唔認為係一件好事，請乖點）

阿仔，For your reference!

阿仔阿仔，要變就請變做粉紅色衫Leon哥哥般靚仔!!!記住咪搞錯兩個著黑衫的叔叔!!!

(相片由Silvia姨姨送贈)

我係Takumi!!!!

今日爹地同媽咪又帶我到胡醫生度做檢查，胡醫生同媽咪講我係個百分百的男仔，無搞錯！媽咪即刻好唔開心，佢居然仲天真地希望我收埋個咕咕，但醫生俾佢睇我除左咕咕外，兩邊仲送隻蛋蛋，想唔係男仔都幾難！！Hehehee...

媽咪，你唔係成日話金城武哥哥靚仔咩？我同佢都係中日男仔混血兒黎o架！你睇多Ｄ佢個樣啦，我盡量生得靚仔Ｄ啦！好唔好？？！！

(媽咪按：你有馬渡肥肥爹地的 DNA，想似金城武？想創你個心啦！灰...)

媽媽吃醋！

媽媽今早返工俾陣大風一吹，滑到ＰＫ了，當然佢好唔高興，一早要清潔傷口同貼膠布，但最令佢唔高興的是爸爸居然響電話第一時間問我有無事，無問候媽咪痛唔痛，媽咪周圍同人講話佢要仔唔要老婆！hahaha....

梗係啦，我係佢個寶貝仔黎喎！媽咪你吃醋都無用了！！今日嫲嫲寫信俾媽咪，讚我個鼻仔高高，應該好靚仔喎！識貨！！XD

海膽

今日爹地同媽咪出街同爹地的朋友食午飯，佢地去左Sogo隔離的天勺松島食日本野，媽媽賞賜了我一舊好好好好好味的海膽壽司，正呀！！我第日大過要食好多好多uni!!!

雄兔腳撲朔，雌兔眼迷離，兩兔傍地走，安能辨我是雄雌？

媽咪同爹地今日帶我到尖東做檢查，醫生好仔細咁幫我數齊１０隻手指仔同腳仔，我仲好犀利咁表演左一下蜈蚣彈佢地睇添！

話說我一向都係頭在媽咪左邊咁訓覺的，但媽咪無端端好大聲笑我唔肯舉起另一隻手俾醫生數，於是我費事佢煩，就一野由左彈去右舉起隻手俾醫生數，連醫生都笑我咁乖咁合作！

媽咪就係掛住數我的四肢健不健全，差Ｄ唔記得問我係男仔定女仔，醫生指住個LCD話個咕咕咁大都睇唔到？媽咪因為聽過Auntie講男女初期都有咕咕，所以再問醫生我係男仔定女仔！醫生於是話佢聽，如果咕咕的豎起角度多於30度，就應該係男仔，如果少過30度就可能係男亦可能係女！醫生話我個咕咕係多個30度......未出世就豎起，勁唔勁呢？ XD

爹地同媽咪之後講，佢睇住個LCD時成日係望住我兩隻腳中間，佢都睇到咕咕，咸濕！！

媽咪話左俾公司的Auntie，佢朋友Uncles & Auntie，同埋佢媽咪聽，佢地都好開心，唯有媽咪仲希望我可以好似另一位Auntie的ＢＢ一樣遲Ｄ變返女仔，睇下點！！不過佢地宜家要煩改名了，暫時話叫我做Takumi，即係藤原拓海個名，不過用發音相同的「巧」字，cool?

仲有，我今日有6cm了，快高長大！！

又見面了！

今日爹地同媽咪帶我到胡醫生度檢查，我宜家有4.3cm了！三星期前我只得1.5cm，係咪大得好快呢？胡醫生仲搵左我對手仔同腳仔出黎俾佢地睇，爹地見到我郁郁下，好開心好興奮呢！下星期媽咪會帶我到尖東的另一位醫生度度頸皮，到時就睇下我心情好唔好啦，好的話就俾你知下我應該係男仔定女仔啦！！

名字由來

各位知唔知點解Daddy Mommy成日叫我做Haruka? 其實呢個名遠在約10年之前Daddy巳經改定了....

話說當Daddy Mommy仲係拍緊拖的時候，Daddy被當時的公司由東京派到福井及大阪工作幾年，所以Daddy同Mommy成日都會用關西機場飛黎飛去見面。由關西機場出返市區的鐵路叫做Haruka Express，所以Daddy話Haruka係維繋佢同Mommy之間感情的重要一環，第日個BB都要叫做Haruka喎!

以前Daddy覺得Haruka係一個中性名，男女合用，但最近又覺得呢個名好女仔，所以話如果我係男仔，就要改過另一個名喎! 我媽咪就話一定要改返Haru-XX，因為呢個名講咗十年，好有感情...但Daddy又話要改過一個MAN D的名...搞黎搞去都未搞完!!!!

我玩野!!

尋晚我玩野，哈哈哈...

話說尋晚媽咪好有心機咁煮咗味墨魚丸烏冬同我分享，佢食完睇男人唔易做同法證實錄我都由佢安安樂樂，等佢要擦牙瞓覺之際，我突然迫佢嘔返晒D墨魚丸出黎，大家留意，只係果七粒墨魚丸，烏冬我就照單全收，佢激到BA BA聲，氣憤地同爹地投訴，又如何，宜家我話事嫁嘛!!!

令佢最嬲的是，墨魚丸在厠所入面係浮面的，佢用盡方法先可以沖走晒佢，我玩野叻唔叻呢??!! XD

爹地出trip!

我爹地明天起要出trip，星期日先返！弊啦，每朝早爹地都會隔住媽咪個肚皮同我講ohaiyou，晚上講oyasumi的，明天早上聽完之後要等到星期日先聽到佢把聲添！！

俾媽咪鬧

呢幾日我成日俾媽咪鬧，點解？因為我揀飲擇食之過......

話說媽咪上星期到大排檔食過一晚通粉，一晚义燒瀨粉，同埋一晚哈廸斯雞雞，誰不知本少爺／小姐唔高興食通粉同雞雞，迫媽咪個胃嘔返出黎，但义燒瀨粉就啱我口味，由佢食...

媽咪同爹地講，話如果我咁百厭搞到佢無啖好食，第日等我出黎之後就唔俾飽奶我食喎。我就離好驚啦，成屋人錫到我濃，怕我食唔飽？傻傻地嫁！

新屋入伙！！

呢個係我媽咪的子宮呀(hahaha)，仲係我租咗十個月的Service Apartment，乜都包嫁，歡迎參觀！！ XD

我來了！

５月１８日，我第一次透過曼受雷敦棒棒同媽咪爹地打招呼，佢地當然好開心啦，但係因為驚我仲未響媽咪身體入面settle down，所以未同人介紹我。各位Uncle Auntie，等多一陣啦，我裝修好屋企之後，媽咪會帶我到胡醫生果度影張靚相俾大家睇嫁啦！！

話時話，我Daddy Mommy都幾勁喎，話去日本製造我就真係赴諸行動，根據一個網頁推斷，我仲係一個好值得紀念的日子：５月４日果日孕育出來的。

可能有些Uncle Auntie響四年前飲Daddy Mommy的結婚酒時都聽過（記得先奇）：

1997.5.4 - Daddy響香港留學完返日本，同Mommy分開兩地
2002.5.4 - Daddy同Mommy擺結婚酒，象徵將一個傷心的日子變為幸福的開始
2006.5.4 - Daddy同Mommy一擊即中，響日本製造了我出黎，幸福之上再加幸福 :D

真好！！

Made in Japan

貪玩的爸爸媽媽為咗rationalize佢地去日本玩的計劃，居然想到用我的名義，激死！與其美其言話要Haruka Made in Japan，不如話佢地兩個返日本購物！佢地5月1日去，留成六日五夜，真好！

世界是怎麼樣的呢？

在2006年3月18日，媽媽為了迎接我的到來，開始依照書本的指示服用葉酸，希望我可以健健康康的出世，我也十分期待看到這個既充滿色彩，但又光怪陸離的世界...究竟有Haruka存在的世界是怎樣的呢？