蝦媽媽唔識日文之學校篇

話說三月中媽媽同我返學校開家長會.

老師發表完一年嘅感想後,由各位媽媽分享,咁當然個個媽媽都係講日文啦.

輪下輪下,差唔多到媽媽...

我: 媽咪,就黎到你啦!
媽: 係呀,講乜嘢好呢?
我: 但媽咪你唔識講日本話架喎.
媽: 係啦.
我: 咁你講廣東話啦.
媽: 但其他媽媽唔識廣東話喎,我講英文啦.
我: 好啦好啦!

(輪到媽咪發言)

我: (勁大聲,用廣東話)到你啦,到你啦,媽咪唔識講日本話!
媽: (激死,用英文講) xxxxx

(講完)

我: (當住成班大叫) 巧のママ、おもしろいね！(我媽咪係咪好有趣呢!)

(成班大笑)

媽: (激死左,居然用有趣黎形容)

蝦媽媽唔識日文之屋企篇

夜晚爸爸幫我沖完涼,擦完牙,玩一陣之後覺得肚餓,搵左塊麵包出黎食.

我:(走入廚房)
媽: mimi,你入廚房做乜嘢?
我: 食麵包,入去攞搽麵包d嘢.(我平時搽開朱古力醬)
媽: 爸爸話擦完牙唔准食甜嘢喎,你問吓爸爸先.
我: お父さん,チョコレートいい？(爸爸,朱古力得唔得?)
爸: 甘い物、ダメ！(甜嘢唔得!)
媽: 哈,爸爸話唔得喎.
我: (扭計)
爸: マーガリンはいいよう！(搽牛油就得)

(兩囝爺入左廚房,麵包搽牛油,出返廳)

我: 爸爸話食甜嘢都得喎!
媽: 幾時講呀,我聽到爸爸話唔得喎!
爸: (大笑)

爸爸爆響口同媽咪講,響廚房入面,我居然敢話媽咪唔識日文,唔知我同爸爸講乜,食甜嘢都得喎!

我的馬拉松

3月4日係學校嘅首屆馬拉松,媽媽話我居然跑到13名呢!

@MaMa Lunch

生活發表会 (2011.2.11)

為左呢個生活發表会,老師同我地練習左個幾兩個月,媽媽又要幫手淘寶表演戲服,同埋出去同其他媽媽一齊整小物做裝飾.當日我地さくら組み三個表演都超水準,我跳呢隻西蘭花舞笑到全場標眼淚,為年少班的學習作了一個完美的終結.3月中我就完成年少班了,時間飛逝呢~

紀念卡

二月份了,離開完成年少班(K1)的日子只剩一個月.家長們會製作一本紀念冊俾兩位老師,媽媽就幫我將我D大作,配合埋佢上設計堂學嘅技倆,加埋爸爸響背頁寫日文多謝語,製作左呢兩張嘢!

我的志願(四歲版)

今日開車回家的路途中見到警察開電單車,媽媽話我知警察響路上如果見到有人開快車就會截停佢同埋抄佢牌.講下講下,媽媽問我大過會唔會自己渣車...

媽: Takumi第日大過左之後會唔會自己開車呢?

我: 唔鍾意呀!

媽: 點解呀,自己渣車鍾意去邊度就邊度,好開心架喎!

我: 唔鍾意呀,因為我呢,成日撞黎撞去架,撞到要入醫院,見唔到媽咪架!

媽: 原來係咁,咁你第日大過想唔想做警察呀?好似頭先果個警察叔叔咁.

我: 唔得架,我唔做警察架!我都話我成日撞黎撞去,唔可以渣車咯!

媽: (係喎,又幾logical喎)咁你第日大個仔之後想做乜嘢呢?

我: 我乜嘢都唔識架,我做唔到架!我呢,識得瞓覺啦,食嘢啦,打機啦,睇部電腦啦,同埋坐響度架咋!

媽: (Bear一聲!笑死爸爸媽媽!) Wakakaka!!


(媽媽按:仔,媽媽都想有一份工可以淨係瞓覺啦,食嘢啦,打機啦,睇部電腦啦,同埋坐響度,Dream Job,識揀!^^)

白い可樂

我鍾意叫SPRITE(或者7-UP)做白い可樂(白色可樂).
媽媽第一次聽都R晒頭,
我講左幾次佢都GET唔到!@@
但佢諗諗下,又幾係啱喎! ^^

熱 • 凍的小智慧

近日天氣非常寒冷,媽媽幫我準備暖壺弁当,當然媽媽要做食家意見調查.

媽: BB,你今日個お弁当D飯熱唔去呀?
我: 吓,唔熱喎!
媽: 吓,唔熱? 無理由架,個暖壺好保溫架...
(媽媽正思疑個飯壺又爛左?!)
我: D飯點會熱啫,係暖架嘛!

(媽媽按: 咁又啱喎,呢個世界唔係非黑即白,唔係非熱即凍,係有中間位-暖,BB小智慧,點醒左媽媽!)

笑死媽媽笑話數則

(做左件蠢事)

爸：巧、バカ！
我：バカ言ったら、自分がバカ！

媽：哈哈，傻仔黎架！
我：邊個話人傻仔自己就係傻仔！


(餐廳食烏冬中)

媽：BB，用筷子食啦，用匙羹食唔到架。
我：媽咪，我自己食得架啦，我大個仔架啦。

(電話中)

我：媽咪今晚返唔返黎食飯呀？
媽：返呀，放工返黎。
我：咁你一陣記住再打電話俾BB喎。
媽：(敷衍地) 好呀...
我：你唔好唔記得婆婆個電話喎！
媽：我記得架啦。
我：記多次喎，係XXXX-XXXX，寫低佢啦！

(打機中，輸緊俾爸爸)

我：(按PAUSE掣) お父さん、お水！
爸：(死都唔肯) 後で！

爸爸睇穿我想借佢去斟水時整輸佢，死都唔肯去斟水!

(爸爸偷食百力支)

媽：BB去同爸爸講一日食一包好啦！
我：一日食一包？
媽：係呀，唔係佢食晒你D百力支無得食架啦！
我：(彭彭聲跑去爸爸間房) 一っ個だけよ！

(瞓覺前傾偈)

媽：BB響學校最鍾意同邊個同學玩呀？
我：全部小朋友都鍾意！全部都好得意！
媽：咁邊個最鍾意同BB玩呀？
我：全部都鍾意同我玩！我好得意！

(玩完玩具)

媽：執好D玩具先！
我：媽媽都一齊執！
媽：點解我要執？
我：(指住一個corner)媽咪頭先響呢度玩過，玩過就要執，知唔知道，唔係我嬲架啦吓！

(好明顯呢句係媽媽成日講嘅嘢)

Happy New Year!!

12月.1月誕生日会

12月3日,學校舉行生日會,我係全班入面唯一一個響12月同1月生日的小朋友.





同場加映,老師們魔術表演,連園長先生都要粉墨登場,笑死!

溜冰記

學到第四堂,我終於可以企起身...一陣咁多!




同場加映媽媽學神相一幀!

お散步@寶雲道

老師帶我地去散步，戰績，係我嘅寶物！

運動會 (2010.11.20)

今日係學校第十八屆運動會,爸爸媽媽帶我到大球場隔離的印度同樂會參加.今年的天氣風和日麗,仲好晒,比起上年冷到唔識郁,今年簡直係舉行運動會最perfect的日子!

因為唔想同爸爸媽媽分開,所以集合時我喊到隻積咁! >.<


輪到我出場跳舞,扭扭個pat pat開場!


超投入跳舞,真悟先生同我地練習左好耐架啦! 媽媽開頭仲以為我會跳到甩甩漏漏,點知我超水準表現,成隻舞全部動作都記得,唔讚唔得!














* 不過睇左咁耐,有無發現我同其他小朋友有乜嘢分別? --- 我塊面無貼貼紙架! 媽媽之後問我點解,我答佢"BB唔鍾意囉" --- 媽媽按: 仔,你真有性格!

全場景.


爸爸同我去親子比賽.



我讀さくら組!




爸爸做Mr Tickle係咁唧我.


媽媽同我去閉幕,真悟先生每人頒左個獎牌俾我地!

弁当回顧(2010.10.25-29)