@ The Playroom - 爬呀爬呀

我地屋企個會所有個好大的Playroom，爹地媽咪weekend都會帶我落去的，但上星期我落去玩時剩係好似舊飯咁坐響度，今次唔同啦，因為我學識爬爬啦！kakakaa....^^

第一個颱風 - 帕布

帕布好得意架，佢星期頭開始黎香港，打到三號風球就sayonara，點知佢知道媽媽想見佢，今朝一個大U-TURN返黎，媽媽就多半日假陪我了！

帕布係我咁大個BB第一次遇到的颱風呀！^^

爬到了！

爸爸媽媽，我大個仔了，我識得自己爬爬了，我可以控制我的活動空間，唔駛等你抱抱我先可以動了！

媽媽，我的猛長期確實係猛左Ｄ，但個痴線病好了後我便可以爬了，係咪就算辛苦都係值得呢？

爬呀爬呀，好野！！

新奶泵

媽媽為左保護佢對to be翻發的媽媽手，破費買了個Ameda電奶泵，盛惠$1,520...我要俾心機飲多Ｄ奶奶先得啦！

呼風喚雨

婆婆之前講過，男仔bu口水就會下大雨，媽媽仲笑婆婆信埋Ｄpseudo science，一Ｄ都唔科學化。

尋晚同婆婆姨姨爸爸媽媽落會所游完水水返黎後，唔知點解戚起條筋起勢bu口水，bu到件衫都濕晒要換，婆婆話好快會落雨啦。

無錯，訓覺之後就落大雨，係大雨到Ｄ雨聲整醒媽媽。第日見到我bu口水的話就記住唔好室外晾衫，同埋記住帶遮啦，唔好話我唔醒你，我識呼風喚雨架！！

達標

來自eeb-EE的禮物，多謝媽媽呢六個半月以來的奶奶，多謝媽媽陪我渡過一個又一個猛長期的耐性，多謝媽媽令我成為香港BB入面以純母乳餵大到六個月的13.5%的其中一人，多謝媽媽！

Baby-mo

媽媽幫我寄相去Baby-mo雜誌，點知編輯姐姐只係睇中我呢張「肉」照，kakaka...

誤差

今日婆婆帶我到健康院檢查，點知度出黎的結果同星期六響李醫生診所度的有少許不同，係更長重呀！

身長：70.5 cm
體重：9.54 kg

>.<

打針針

媽媽唔捨得我到健康院打兩支針針，一針左髀一支右髀，所以星期六帶了我到李醫生度打六合一。靚靚姑娘又有當值呀，我一見到佢就笑到眼牙唔見眼，幾鬼開心呀！磅重度高度頭之後就做個反應test，當然我實pass啦，醫生同姑娘見我自己都坐都可以坐得咁勁仲讚我叻添呀！

爹地係最開心果個，因為醫生話我同佢似到十足十，讚我叻即係讚佢叻喎...關鬼佢事咩，媽媽響奶奶過左好多DHA同埋OMEGA-3俾我之嘛！多謝媽媽！

V(^v^)V

Growth Statistics: (21 July)

身長：70 cm
體重：9.48 kg
頭圍：41.5 cm

I am the King of the World!

我係皇帝，皇帝係我，所有人都要聽我的命令，隨我的喜好。

朕要食半固體食物，媽媽即刻要買兩套餐具食具放響我兩頭住家；
朕要食生果，白頭公公即張羅粗碌大蕉、富士蘋果、之前仲有香甜啤梨；
朕要食米糊，媽媽被我玩謝，婆婆每天較O岩時間幫我準時開餐；
朕食完半固體食物未能完全消化，每天早上還有一分鐘便要出門口時便整一大包鬼口水俾爸爸歎。

眾卿家，平身！

食米糊第四步曲 - 媽媽的賽後檢討

媽媽經此一役後，revise左食米糊的recipe:

唔要姣婆藍bib，避免分心
要一條麻繩，反綁疑犯雙手
餵食碗要有吸盤
匙羹要大Ｄ
預備一盆暖水同一件衫仔，膳後要立即大清洗
同埋一個EQ勁高的媽媽

食米糊第三步曲 - 唉...哈哈...

其實米糊加媽媽奶真係人間美食，我都食到停唔到口...

但係條姣婆藍色的bib實在太吸引，我食食下顧住同條bib傾偈...

攪到媽媽把幾火，索盛除左我條bib...

咁我就俾心機再食過...

kaka...點知突然間手痕，一手拎起左個碗...倒清光...

繼而攞起個碗豪飲，只不過係拎碗時上下方向調轉左，kakakaa...

我其實好enjoy食架，媽媽唔好嬲啦，睇下我幾cute...

這就是我第一餐媽媽奶米糊的下場，what a pity...

食米糊第二步曲 - 材料篇

除了要準備一個肚餓的我外，媽媽話仲要以下的材料：

Towmee Tippee roll 'n' go bib
Pigeon碗仔 & 匙羹
BeanStalk米がゆ半包
媽媽奶奶兩安

食米糊第一步曲 - 拆米糊

這是我半歲的生日禮物---BeanStalk米がゆ，媽媽為隆重其事，特別用agnes b. le pain grille的絲帶包起其中兩盒等我拆...

下水禮

仲有一日我就半歲大，大個仔了，媽媽幫我plan定半歲就要做好多野，首先係今日行個下水禮先！

呢件係碼數90的泳衣，我著得幾fit!

我和新幹線船仔...

錫啖先my friend...

響水入面浮黎浮去，令我諗返半年前響媽媽個肚入面的情況添...

爸爸自製水底攝影機套黎影我水中的腳仔...

I LOVE SWIMMING!!~~

昨日是七夕

昨日是日本人的七夕，媽媽讀了這首中國人的詩給我聽應節，哈哈：

【七夕】 白居易

煙霄微月澹長空，銀漢秋期萬古同。
幾許歡情與離恨，年年並在此宵中。

在日本，七夕叫做「たなばた」，同中國人一樣，都係出自牛郎織女的故事，但爸爸話日本小朋友會響呢日整樣咁樣O既野，叫做「笹飾り」，並將願望寫響願望紙上。

爸爸媽媽本來尋晚整俾我架，不過我地尋日一早出左吉之島買野，下晝要去混血兒ＢＢ的聚會，夜晚又要同Auntie Kelly & Sussie姐姐食飯，所以今日先有時間，希望遲左一日都ＯＫ啦！

屋企無樹俾我掛，所以創意非凡的媽媽就整了一個咁樣的變種，都ＯＫ呀！

媽媽幫我著上甚平（じんべい），係咪似足一個日本ＢＢ呢？出街時被好多人話我かわいい添！

呀仲有呀，我學緊坐啦，宜家可以自己坐到１分鐘啦！

又係我呀，史力Mi呀！

媽媽從姨姨的blog度抄返黎的相：

7.1 Party之私家sofa

我對肥腳巳經長得滯，唔係好做到袋鼠仔了，媽媽惟有將我條baby sling變成張私家sofa，等我對腳唔好屈住，係咪覺得我好歎呢？





（媽媽按：仔，你就坐得過癮了，難委你阿媽我用條「纖」腰承住成二十磅的你，第日骨質疏鬆唯你事問...）

7.1 Party之攞獎

呢個係我人生之中的第一個獎，哈哈！

共有15個ＢＢ參加呢個比賽，而呢個獎係由參加的家庭一人一票投票選出的，最後我得到冠軍，在此我要多謝媽咪捕捉到呢一刻，亦要多謝我自己咁鬼馬！

7.1 Party之Mickey & Girls

我同Mickey俾三個女仔圍呀！上排Mickey & Minnie，下排左起Mika，我，Amelia。

小熊與我

各位觀眾，讓我介紹我的好朋友小熊！


小熊，黎Takumi呢度...


我地一齊影張相先...


想咬你好耐架啦...咬咬咬...


媽媽，我唔係殘忍呀，小熊的手手腳腳都係牙膠黎架嘛...唔好鬧我啦...

完美五五面

我覺得呢個角度影得我最靚仔，你地話呢？


(媽媽按：仔，你塊面肥到the落黎遮埋個咀啦...)

我的護照

爹地尋日帶我到領事館取護照，好野，我可以隨時離開香港啦！
但係，點解爹地你幫我簽到個名咁核突架，一Ｄ士die佬都無！

東大

爹地媽咪傾開我將來條路點走好，佢地有咁樣o既想法：

幼稚園--->小學--->初中
香港的日本人學校

高中
香港的International School，因為日本人學校無高中，我又應該入唔返本地學校，惟有讀IS

大學
可以讀香港的大學，但如果想返日本讀的話，爹地話有好大機會可以入東大，因為東大有Ｄ位係留返俾外地歸國的學生...

佢地真係呀，諗到咁遠，我家陣先得五個月一星期大...傻架！(-_-)"

媽媽返新工

聽日媽媽就返新工了，當然人工假期福利成個package都比舊果份好啦，不過我最開心係媽媽只需要返五日工，新公司離婆婆屋企又近Ｄ，我就有多Ｄ時間對住我最錫佢，佢又最錫我的媽媽啦！媽媽，你同爹地俾心機賺錢錢呀，今日四叔公先話養我唔止四百萬架！

（媽媽按：老細，收到收到，甘為孺子牛，你間幼稚園一個月收成五千蚊，唔搵多Ｄ點掂呀...）

「坎」@半島酒店

爹地媽咪尋晚帶我去半島酒店參加Auntie Virginia & Uncle Sterling的喜酒，我咁大個仔（五個月）第一次去半島酒店好開心呀，所以成晚都響度講野，但當主人家致辭時我就好有manner咁停低聽人地講野，幾乖呀。

你知嗎，我地果圍連埋爹地同我有六個半日本人，有四位外籍人，而我同媽咪加埋得一個半中國人，成圍檯都唔係講廣東話架，我今晚就學晒中文、日文同英文啦，靈格風都無咁勁呀！

祝Auntie Virginia & Uncle Sterling新婚愉快，永遠幸福！

證件相

爹地媽咪響我三個月同四個月時帶過我去照證件相，當然係入左舖頭之後運左隻桔出黎啦，我果時都唔識坐！

尋日佢地再帶我去影，登登登鄧，搞掂！好彩fotomax入面個哥哥好心機！爹地負責扶住我，媽咪負責響影相哥哥隔離叫我望住，「BB...BB...」「Takumi....Takumi...」「呢度...呢度...」，好似個傻婆咁，你知Times Square間fotomax幾多人啦，我費事俾ばか媽咪搞到我響Times Square無晒「飛屎」，所以好合作咁影左幾張OK o既相，因為我仲要黎Times Square蒲架，我最歡喜去同層果間奶奶房食奶奶架，尋日都食左兩次lu...不過其實影相時，成間舖Ｄ人都望住我，我都有Ｄ唔好意思... (+_+)"

爹地話星期一就幫我去領事館申請passport，之後媽咪要幫我去入境處申請加簽，咁我就唔駛申請特區護照，因為日本政府只接納單一國籍，唔可以hold兩本passport架....

突破20關口

爹地同媽咪帶我到李醫生度食第二劑輪狀疫苗，我幾勁呀，等醫生時果20分鐘我賴左兩次屎呀...你知唔知點解？因為醫務所果度個靚姑娘幫我換片片時好溫柔好細心架，我仲突登流口水流到件衫濕晒，等阿靚姑娘幫我換埋衫！爽呀！

巡例真要報告下我的體重同身長：

體重：9.21 kg (>20 lbs)
身長：68.5 cm

突破左20磅的生理關口啦！醫生同靚姑娘都話強呀！

（媽媽按：仔，我就黎揹唔起你啦...Baby Sling都俾你坐斷呀...)