小熊與我

各位觀眾，讓我介紹我的好朋友小熊！


小熊，黎Takumi呢度...


我地一齊影張相先...


想咬你好耐架啦...咬咬咬...


媽媽，我唔係殘忍呀，小熊的手手腳腳都係牙膠黎架嘛...唔好鬧我啦...

完美五五面

我覺得呢個角度影得我最靚仔，你地話呢？


(媽媽按：仔，你塊面肥到the落黎遮埋個咀啦...)

我的護照

爹地尋日帶我到領事館取護照，好野，我可以隨時離開香港啦！
但係，點解爹地你幫我簽到個名咁核突架，一Ｄ士die佬都無！

東大

爹地媽咪傾開我將來條路點走好，佢地有咁樣o既想法：

幼稚園--->小學--->初中
香港的日本人學校

高中
香港的International School，因為日本人學校無高中，我又應該入唔返本地學校，惟有讀IS

大學
可以讀香港的大學，但如果想返日本讀的話，爹地話有好大機會可以入東大，因為東大有Ｄ位係留返俾外地歸國的學生...

佢地真係呀，諗到咁遠，我家陣先得五個月一星期大...傻架！(-_-)"

媽媽返新工

聽日媽媽就返新工了，當然人工假期福利成個package都比舊果份好啦，不過我最開心係媽媽只需要返五日工，新公司離婆婆屋企又近Ｄ，我就有多Ｄ時間對住我最錫佢，佢又最錫我的媽媽啦！媽媽，你同爹地俾心機賺錢錢呀，今日四叔公先話養我唔止四百萬架！

（媽媽按：老細，收到收到，甘為孺子牛，你間幼稚園一個月收成五千蚊，唔搵多Ｄ點掂呀...）

「坎」@半島酒店

爹地媽咪尋晚帶我去半島酒店參加Auntie Virginia & Uncle Sterling的喜酒，我咁大個仔（五個月）第一次去半島酒店好開心呀，所以成晚都響度講野，但當主人家致辭時我就好有manner咁停低聽人地講野，幾乖呀。

你知嗎，我地果圍連埋爹地同我有六個半日本人，有四位外籍人，而我同媽咪加埋得一個半中國人，成圍檯都唔係講廣東話架，我今晚就學晒中文、日文同英文啦，靈格風都無咁勁呀！

祝Auntie Virginia & Uncle Sterling新婚愉快，永遠幸福！

證件相

爹地媽咪響我三個月同四個月時帶過我去照證件相，當然係入左舖頭之後運左隻桔出黎啦，我果時都唔識坐！

尋日佢地再帶我去影，登登登鄧，搞掂！好彩fotomax入面個哥哥好心機！爹地負責扶住我，媽咪負責響影相哥哥隔離叫我望住，「BB...BB...」「Takumi....Takumi...」「呢度...呢度...」，好似個傻婆咁，你知Times Square間fotomax幾多人啦，我費事俾ばか媽咪搞到我響Times Square無晒「飛屎」，所以好合作咁影左幾張OK o既相，因為我仲要黎Times Square蒲架，我最歡喜去同層果間奶奶房食奶奶架，尋日都食左兩次lu...不過其實影相時，成間舖Ｄ人都望住我，我都有Ｄ唔好意思... (+_+)"

爹地話星期一就幫我去領事館申請passport，之後媽咪要幫我去入境處申請加簽，咁我就唔駛申請特區護照，因為日本政府只接納單一國籍，唔可以hold兩本passport架....

突破20關口

爹地同媽咪帶我到李醫生度食第二劑輪狀疫苗，我幾勁呀，等醫生時果20分鐘我賴左兩次屎呀...你知唔知點解？因為醫務所果度個靚姑娘幫我換片片時好溫柔好細心架，我仲突登流口水流到件衫濕晒，等阿靚姑娘幫我換埋衫！爽呀！

巡例真要報告下我的體重同身長：

體重：9.21 kg (>20 lbs)
身長：68.5 cm

突破左20磅的生理關口啦！醫生同靚姑娘都話強呀！

（媽媽按：仔，我就黎揹唔起你啦...Baby Sling都俾你坐斷呀...)

生吞Barbapapa

我好鍾意Daddy架，所以對同Daddy一樣有啤梨身形o既Barbapapa都好有好感...

媽咪個Barbapapa Gumball Dispenser:

食唔到入面的Gumballs，LAI下都好...

OK喎，幾o岩咀形喎，吞左佢個頭先...

午閣越山溢塊絡

鵝金溢午閣越山溢 XD


Caption : 美心買的Lemon Cheese Cake


Caption : 我與四個月同五個月的禮物合照


Caption : 其實關鬼我事，我都無份，食手指好過

五個月大

今日係6月15日，我五個月大了!爹地宜家響上海出trip，但今晚會趕返黎同我慶祝，媽媽話今晚會買蛋糕回來...關我鬼事咩...我反而想快d到下一個月，到時就可以食美味媽媽奶糊仔了...XD

Bumbo Chair = 痰罐

記得我有張Bumbo Chair嗎？原來Bumbo Chair除左可以幫我學坐之外，仲可以教我去toilet。婆婆幾個星期前開始，逢朝早十一點左右就放我坐Bumbo，我就知道係屎屎時間，砵...砵...砵...，舒服晒，萬試萬靈呀！

勁唔勁呀，我四個幾月時就開始toilet training啦！


（舊相）

史力Mi

姨姨買了對史力加耳仔俾我，係咪cute到震呢？

豬樣

阿傻媽見傻姨影左我張豬樣相就有樣學樣，影左張咁o既相出黎，我第日點出黎「界」女呀！

救命呀，佢地喪架！ (@_@)"

腳指

前兩日我開始發覺腳腳原來好好食好好玩的！咸咸地，好食過牙膠呀！

變魔術

媽媽幫我整左兩張「整容前」「整容後」的相，第一張係半個月大時候的我，第二張係今朝（四個半月）的我，好似變魔術咁，轉眼間我就大過左咁多了！

瘦手，瘦面，瘦腳

月巴手，月巴面，月巴腳

I am Linus!

我好鍾意攬住紗巾訓覺的，媽咪話我似足Linus，你地話似唔似呢？^^

爹地與我

呢個係我爹地：

呢個係我：

似到咁，打仗都失散唔到。^^

媽媽的奶奶好好飲

我Takumi-mi最鐘意飲媽媽奶（其實我係無第二樣選擇，呢幾個月以來連水都無乜飲過），其他ＢＢ仔有時唔乖，唔肯飲奶，但我大食Takumi到宜家為止都無玩厭奶，每次飲奶奶都扯盡唔會浪費，因為我知道媽媽泵奶好辛苦的！同埋，媽媽奶奶真係好好飲的，仲好有營養，你睇我咁大隻就知道媽媽奶好啦！

我要買過D衫!

媽媽今朝幫我著件姨姨上個月買俾我的衫衫出街，果件衫係9-12個月的碼黎架，不過唔知點解我一著上身就好緊又唔夠長，我真係大碼得咁緊要??!!

媽媽話要幫我買過D衫衫先得了，但宜家又無大減價，佢實唔捨得啦，因為我一件衫仔平均只可以著3-4次，然後就唔o岩著了... >.<

羊角頭

鬼主意多多的媽媽響Baby Kingdom學左點樣摺羊角頭，梗係第一時間搵我黎做模特兒，cute唔cute呢？

沒有媽媽陪伴的一晚

媽媽尋晚有事，會成十一點先返屋企，為左唔好騷擾我訓覺覺豬，佢將我放在婆婆屋企過夜。呢次係我出世咁耐以黎，第一次媽媽夜晚唔響我一百步範圍之內呀，不過婆婆俾左奶奶我飲之後就同我一齊訓覺，我都一覺訓到天光。叻唔叻呢？梗係啦，我大個仔架啦！

無淚打針

尋日媽咪同婆婆帶我到健康院身體檢查同打針，去到等左一陣就入去磅豬仔，同上個星期一樣都係8.6kg，身長67.5cm，頭仔42cm，唔駛講都知我除左個頭之外，全部都係超標啦，不過姑娘話無問題，因為超大碼的媽媽奶Ｂ係無需要減肥的。

姑娘繼續同我做motor skills同eye-hand coordination的test，我一見佢拎個鈴鈴出黎，就伸出兩隻手想去拎住佢，因為我想食鈴鈴呀，果個鈴鈴我未見過呀，一定好好食！但姑娘見我想拎就將個鈴鈴移向左移向右，我想拎都拎唔到，惟有用對眼跟住個鈴鈴，用眼睛去食佢啦。姑娘話我犀利，有乜咁犀利，為左食野，我打個筋斗你睇都得呀！

最後係打針，婆婆同我坐響打針房出面同隔離C9吹水，個個ＢＢ都係笑住入去，喊到拆天出黎，媽咪就好擔心我喊到收唔到掣，諗住打完針就即刻捉我入哺乳室飲奶奶止痛。入到打針房，姑娘叫左我個名同月齡就一針拮落黎，我覺得有一針拮落黎嫁，不過我個大髀咁肥美厚肉，一Ｄ都唔痛，呀左一聲就繼續同媽咪笑笑口，醒唔醒呢？媽咪見我咁叻，而且又要等二十分鐘先走得，就帶我入哺乳室飲奶奶獎勵。喊又有得飲，笑又有得飲，我梗係笑住黎飲啦！

Takumi Michelin

媽媽話我要改姓了，Michelin比Mawatari更適合我喎！>.<

身型數字

尋日媽咪同婆婆帶我到銅鑼灣李醫生的醫務所食輪狀病毒疫苗，當然會度下我的身型啦：

月齡：差一日就夠4M
頭圍：41.5 cm (50線)
體重：8.653 kg (爆燈)
身長：66.5 cm (頂點)

哈哈哈!! XD

Bumbo!

呢張椅叫個Bumbo Chair，係南非(!)的產品，媽媽今日帶我到舖頭度試坐，我坐得好開心呀，所以不斷講野。媽媽見聽日就係我四個月生日，花了$360大元買了俾我，當係我的生日禮物！:-)

子供の日

聽日5月5日係我第一年過子供の日，可惜媽咪爹地今年忘了買鯉魚旗俾我，惟有帶我地太古城，借APITA出面的鯉魚旗一用！唔制呀，我下年一定要有鯉魚旗呀！

其實除左鯉魚旗之外，慶祝子供の日仲有帶頂將軍帽。充滿創意的爹地媽咪就幫我用花紙整左頂麵飽超人將軍帽，係咪好得意呢？

365日紀念日

呢個係媽咪print screen轉貼落黎的record，我的製造日期係2006/5/4，預產期係2007/1/25，最終我係響2007/1/15出世，但對我來說，今日就係365日紀念日，我的生命由365日前就開始了！！

媽媽給Takumi BB的情書

My dearest Takumi BB,

雖然老土Ｄ，但都要講句「光陰似箭，日月如梭」，Takumi BB你巳經做左100日人仔，響呢100日入面，你為好多人帶來歡樂，帶來希望，帶來疲倦......

你知道嗎？媽咪由細到大都係條出晒名的懶蛇，讀書讀到碩士畢業，咁耐都係靠一點小聰明，未曾真真正正用功過。但係為左你呢個小豆丁，呢條冬眠左三十年的懶蛇終於出動，日以繼夜地照顧你，怕你著涼，怕你太熱，怕你吃不飽，怕你著不暖，連我自己都嚇了一跳。

媽咪知道媽媽奶好，自你出世第二天起，你便吃媽媽為你炮製的奶奶。你在猛長期的猛法，每個鐘食一次，每次九個字，相信到你長大成人時我都會記得那時仔不離手的時間。但見你每次吃完奶奶時的滿足樣子，媽媽就覺得一切都是值得的了。

以前媽咪返工都會打扮一下，但現在你早上到婆婆家的路程中，喜歡將小面孔堆到媽媽的面上親親，媽媽為怕你敏感，不再塗上化粧品。在公司時又要準備你的奶奶滿足你的大胃口，每天都一個大信差袋加上一個午餐袋放奶泵奶樽，一點又不瀟灑，更有點老土，但見你每天長大，老土一點又如何。過去的一個月內，媽媽差不多每天在公司吃飯盒，為的就是要掙點時間為你準備糧食，悶是悶了點，但媽媽做得十分心甘情願啊！

Takumi BB，爹地媽咪是經過好多年的計劃才決定將你帶來這世界上，希望你可以快快樂樂，無憂無慮地成長。你也要俾心機長大，俾心機學習呀，爹地媽咪錫晒你，亦會同你一齊努力，做對好父母！

媽咪上

100日PARTY

今日終於舉行左我個100日Party，多謝...

爹地媽咪咁錫我


Uncle Auntie的禮物


同埋...

Enya姐姐的強吻！哈哈！

星期日見!!!

多謝各位Uncle Auntie 賞面，媽媽話加埋Daddy的朋友，同埋我地屋企人，有超過30人黎我個Party呀...好開心好期待呀!!!我地星期日見啦!!!

袋鼠仔Takumi

我同Takumi出街係用條baby sling的，因為阿仔越黎越大仔，以前用開的cradle hold佢開始唔係咁鐘意，因為佢比較難八卦周圍發生o既事。於是乎我試下用kangaroo，佢好like，但我怕佢條頸仔仲未夠硬，可能過多一兩個星期先咁樣出街玩啦！

相樸力士Takumi

記得嗎？呢張係二月影的...


呢張係四月影的...


留意個盆巳經換左，因為阿仔真係大左好多......連響Photoshop框住黎遮住果撻都大左好多...勁！;-P

100日PARTY

媽咪將於下星期日同我開百日PARTY呀，各位Uncles & Aunties請俾面出席呀！！

日期：2007-4-29
時間：2 pm - 4 pm
地點：曉暉花園會所

大頭蝦的媽咪可能會唔記得send invitation email俾你架，但請email/打電話俾佢等佢預下人數啦！！到時見！！

I am turning 3 today!

3? 唔係三歲，三個月O者！

爹地媽咪買了三件slice cakes慶祝我今日三個月生日，三個月三件，四個月四件......到了一歲就一個蛋糕，兩歲兩個......haha....

仲有呀，媽咪終於著手幫我攪100日party，佢會好快通知各位uncle, auntie詳情啦，記住俾面出席呀！！;-D

又開Party

爹地媽咪上星期六(4月7日)帶我到將軍澳中心同一班2007年1月出生BB開PARTY，好好玩的...不過我都訓左半場...

但我好開心可以同Mika啜啜呀...佢返去馬來西亞啦...我會好掛住佢!

睇下我到二十幾個BB張大合照幾勁呀!!搵唔搵到我呢?



係上排由右數第三個呀...隔離果個就係Mika啦!

大傷風square2

媽媽大傷風，我同媽媽關係咁密切，當然都俾佢惹到啦！
不過唔駛驚，媽媽會透過奶奶俾Ｄ抗體俾我，幫我打走Ｄ病菌嫁！